老鍋台式火鍋 (京都廣場) (已結業)

其實食過咁多間台式火鍋，我覺得最好食嘅暫時都係呢間，因為佢啲款式好多之外，樣樣嘢都好新鮮。今日我仍然都係為咗啲鴨血而嗌左個麻辣鍋，因為佢嘅麻辣火鍋都有另外念念不忘嘅鴨血，份量仲好足夠添。今日仲叫咗一樣新嘅嘢食，台式臭豆腐，佢呢個臭豆腐臭得來又含蓄，唔會話大陣味到人哋用奇怪嘅眼光望住你，佢個臭豆腐炸到脆卜卜，加埋佢啲甜醬同埋酸辣白菜，又幾好食喎。然後佢哋最近出咗呢個新嘅井字丸餃拼盤，分別有魚皮餃，雲吞，蝦丸同埋豬肉魚蛋。佢啲雲吞嘅蝦真係大大粒，超彈牙。個蝦丸都好彈牙，好好食。另外最特別嘅一個豬肉魚蛋，平時蟹子丸海膽丸就食得多，中間包住啲有肉質嘅豬肉就真係比較少，感覺好似食緊彈牙版嘅小籠包咁。牛肉我地今次揀左安格斯小肉排，佢呢個牛真係不得了，就算唔覺意淥耐左，都仲係好腍，因為佢脂肪分配平均，而且有淡淡牛味，食落唔會太燥嘅感覺。另外仲叫左個小羊肉片，其實食羊肉我好揀擇，因為我唔食得騷味，但係佢呢個羊一啲都唔騷，個肉質又唔會好碎，我同男朋友都表示滿意。我地今晚仲叫左個白鱔片，佢個鱔都好新鮮彈牙，而且切得好好，唔會食到骨。最後仲有呢個次次都必嗌嘅黑白雙滑，呢個墨魚滑真係好彈牙，而且最重要係新鮮。