Running 燒 (已結業)

平時食開韓燒放題，好多時候都係去兆萬中心，但其實彌敦道726號有棟新大廈，入邊開咗唔少好嘢食，其中一間就係running燒。如果你有book位嘅話，其實都幾快有得入座，座位同座位之間都算闊落。同朋友傾偈都唔怕俾人聽到，少咗好多不必要嘅尷尬。講返嘢食先，呢度有雞牛豬羊各種肉類同埋海鮮選擇，另外都有一啲熱食例如餃子、炒粉絲、炸雞等等。嘢飲方面，主要都係一啲韓國罐裝飲品同汽水烏龍茶，要留意嘅係酒精飲品需要額外加錢。我個人就比較欣賞呢度嘅牛肉，因為款式真係好多，唔同部位嘅牛都會有。如果大家肚餓又心急，不妨試吓佢哋嘅牛五花，因為本身已經有醃製過，而且切成薄片，相當快熟、入味，大胃王嘅話可以陪埋紫菜溫泉蛋飯，分分鐘仲好食過出邊專賣肉丼嘅舖頭。海鮮都有唔少選擇，而且質素都唔差，不過生蠔要燒嘅時間比想像中耐，唔建議點太多，哈哈。整體來講，餐廳觀感唔錯，如果坐窗邊更加有街景睇，食物品質高，物有所值。最後不得不提係難得好嘅服務態度，服務員多數都好有禮貌！