18樓雞煲火鍋專門店

营业中

休息中

今日又去咗荃灣吉之島掃貨， 朋友建議想食雞煲， 記得幾個月前喺荃灣試過一間幾高質嘅雞煲 所以推介佢哋去試， 由於時間係星期一嘅五點鐘左右， 所以好快有位， 餐廳座位大部分都係卡位， 幾闊落， 餐枱都好大張唔怕嗌到成枱嘢唔夠位擺。雞煲( 唔辣)坐低店員主動問我哋雞煲要幾辣， 由於我哋有一位朋友唔食得辣， 所以叫咗個唔辣嘅雞煲， 但係我自己跟另外一個朋友就好想食辣， 所以另外要求店員畀一碗麻辣汁我哋調味， 味道方面雞煲嘅醬汁好濃， 好惹味， 份量方面大約有一隻雞左右嘅雞肉(3人)， 淨係食雞都開始有少少飽。 食完雞煲就開始叫火鍋配料打邊爐。雪花肥牛和特級肥牛兩款肥牛嘅油脂分佈都好均勻， 幾有牛味， 呢個價錢嘅火鍋放題， 有呢種牛肉嘅質素，幾抵讚。自家製響鈴記得呢度嘅響鈴係自家製嘅， 所以今次都嗌多兩碟嚟食， 放落湯度浸大概三至四秒， 拎返上嚟啱啱好， 索曬啲湯汁， 仲有少少脆口。海中蝦+ 是日海鮮(蜆)蝦都算幾大隻夠爽口， 其中一位朋友一個人食咗三碟。 蜆味道鮮甜。其他火鍋配料嘅質素都唔錯， 白鱔片都幾新鮮， 仲有呢度嘅粟米餃和韭菜餃都係自家製。