滿記茶餐廳 (已結業)

尋日師傅一條友去左食晏, 忽然間好想黎多次呢間食店, 食多一次, 所以就向住呢個目的地進發!入到去一坐底即刻柯打野食, 師傅睇下有咩好食, 見到個午餐, 有幾款都好吸引, 真係樣樣都好想食, 最後諗左一陣要左A餐, 今次就揀左白湯同凍檸茶!等左一陣就有得食, 先試下個湯, 忌廉湯都幾忌廉下, 而d料係火腿蓉, 味道唔錯, 唔會太咸幾好味; 主菜係蒜蓉雞扒火腿飯, 賣相唔算特別靚, 試下個蒜蓉汁先, 味道都唔錯, 而且唔會蒜蓉味唔算特別濃, 啱晒師傅口味; 火腿就冇咩特別, 但雞扒就值得一讚, 皆因斬件上, 唔使切免麻煩, 更加啱晒師傅呢d懶人, 雞扒都煎得幾香, 加上好滑身, 唔錯; 而凍檸茶就一般d, 比較甜, 麻麻地!總括黎講食物質素可以, 地方幾細, 服務殷勤, 價錢都唔算貴, 三十蚊有湯有飯有茶, 都算幾抵食; 再次光顧都冇令師傅失望, 下次有機會師傅一定會試下佢d炒野, 所以一定仲有下次, 可以啦! 師傅覺得有時喺冇咩要求嘅情況下, 係會特別易滿足, 而呢一餐正正做到呢樣野!