富臨酒家 (已結業)

任飲任食火鍋 $105創興有好多間打邊爐，格完價之後就黎左呢間。呢間野講明只可以任飲任食2個小時，超時每小時每人$30蚊，好驚囉﹗我地入座果陣問知客小姐係咪一夠鐘就要走，知客小姐就話可以埋單先，然後繼續食未食晒o既野。我地食左接近2個小時果陣，聽到阿姐提附近枱果d 人：「你地夠鐘啦﹗」呢句說話都幾恐佈，心情唔好的話都想講句「你夠鐘我都未夠鐘啦﹗」講反d 野食，因為我地都好餓，所以一口氣就order 左勁多野食，全部都份量多，同埋黎足我地叫o既野。當中最好食係肥牛：夠新鮮夠大碟，食完再encore。鮮牛肉：非常滑，但係唔係太牛肉味。芋頭：都差唔多過晒當造o既時間，但係仲夠粉，好味。粟米：非常甜同埋新鮮。魚腐：冇骨，彈牙，魚肉份量多。我地足足食左4個小時，飽到頂，亦好滿足。估唔到105蚊可以食得咁暢快。不過services真係一般，尤其是久唔久會有人黎數下你枱仲有幾碟野未食，同埋叫得太多佢會同你講食唔晒5蚊一兩，有d似「大」下你咁o既感覺。另外環境係勁迫，我坐近路口都仲可以方便上菜，坐入面果d 要人幫手傳黎傳去至得。