樂天大喜屋 (已結業)

今日同朋友去創興樂天大喜屋食放題，入到去覺得裝修好有格調，同埋好清潔整齊，坐得都幾舒服。坐低叫野食，食物選擇好多，有一定唔少得嘅壽司、刺身、串燒、天婦羅，仲有甜品同埋fusion嘅食物，其中最意想不到嘅就係呢個吉品鮑汁燴花膠la，花膠同冬菇都整得好林，食落去好滋補。壽司有好多唔同種類，有樂天大喜屋嘅創意壽司、細細粒嘅波子壽司，亦有火炙壽司，賣相精緻，用料新鮮，味道幾好。我地仲叫左燒香草羊鞍同牛柳粒，調味到位，亦冇煮到過熟，生熟度啱啱好。餐廳近門口有自助區，可以隨意攞自己鍾意嘅飲品飲。重點係飲品選擇極多，除左有果汁同茶等等之外，仲有清酒、梅酒、啤酒任斟任拎！自助區亦有唔同食物可以攞，有沙律、熱食（例如章魚小丸子、關東煮、咖啡魚蛋）同甜品。整體而言，呢度嘅食物無論賣相定味道都唔錯。至於服務方面，員工都好有效率，野食好快就送到，亦冇漏單嘅情況。