宅麵專門店 (已結業)

行完街，八點半過後，到咗宅麵專門店嘅宵夜時段，有七折，同女女入去食晚餐，我點咗個黑地獄味噌拉麵加$2轉博多拉麵同埋明太子大蝦炒烏冬。睇真D，上枱嘅係蟹籽大蝦炒烏冬，我問替我寫單嗰位（我猜他是店長）確認，是否廚房弄錯，哈﹗他竟然咁答我：「我哋係用呢隻喎，如果唔啱食，可以同你換過。」吓﹗咁都得﹗如果落單時同我講聲，冇明太子轉蟹籽O唔OK，我絕對冇問題，但唔出聲博我唔識貨，咁就違反商品說明條例啦﹗至於食物方面，做得幾OK架，烏冬煙韌彈牙，每條都有掛汁，蝦夠爽，可惜配蟹籽就有點兒失色；至於黑地獄味噌拉麵，梅頭叉燒夠焾、夠滑、唔肥同唔黐牙，湯底冇一般味噌湯底咁鹹（因我喜歡清淡），幾鮮味。呢間麵店，我幫襯過好幾次，食物質素唔錯，但營商手法好有問題，好似今次事件，我猶疑一陣，俾個「OK」抑或俾個「哭面」佢好呢，結果。。。。唉﹗呢D咪叫做一粒老鼠屎整壞成鍋粥囉﹗