家賀屋刺身寿司專門店

朋友知道我想食呢間日本料理好耐，因為網上成日見到人分享佢地嘅吞拿魚盛，覺得好吸引，終於得償所願，而且整體都好高質，冇信錯食評呢！我地大概8點到達，因為係平日，唔算好爆埸，約7成滿座。以上樓店而言，足見人氣。餐廳環境寬敞，樓底高，睇落幾高級。原來仲有定食供應，有刺身、壽司定食，定價中上；平價啲嘅可以選擇丼飯，百零蚊有交易。點菜後，好快就上菜，最先上枱係友人嘅燉蛋，佢就話不過不失。蟹籽沙律：份量較少，呢度嘅食物份量安排唔錯，唔會話大大份，表示如果日後人少少再黎都唔怕叫唔到好多款式。沙律新鮮，唔會太酸。另外有12蚊件嘅壽司做優惠，幾抵食，所以我地主力食呢張餐牌上嘅壽司。其實12蚊件，就話平唔平，話貴唔貴，好多連鎖野，板長呀、元氣都差唔多價錢，但呢度質素來得要好！壽司：三文魚腩、劍魚腩、油甘魚、象拔蚌、赤貝、特大赤蝦、立魚、火炙安格斯牛、芝士飛魚籽、汁燒海鰻、七味燒鯖魚、辛柱貝，12蚊件！大件夾抵食，特別推薦三文魚腩、赤貝、赤蝦、油甘魚，新鮮肥美卷物：牛油果軟殼蟹卷非常大件，屬飽肚野，我諗起早年元朗曾經流行嘅大件壽司。軟殼蟹都幾大隻，裡面加左牛油果、青瓜絲，大滿至於我期待嘅鮪盛，都冇令我失望呢