嘉多莉餐廳 (已結業)

估唔到師傅話過唔黎, 點知又黎左...........一早起身趕住返去監房, 但又好鬼肚餓, 於是決定拿拿聲去食過早餐, 所以首要條件係要近同快, 於是師傅只好揀呢間食店!入到去人唔多, 一坐底二話不說就柯打野食, 揀左自選麵餐, 而自選麵餐有蒜蓉包, 火腿煎蛋, 同一碗粉麵, 師傅當然係揀左至愛嘅五香肉丁公仔麵, 而餐飲就係凍檸茶!蒜蓉包都幾大個, 而且幾香蒜蓉, 入口鬆軟, 味道不錯; 火腿煎蛋就煎得油少少, 火腿薄薄的, 不過冇咩特別, 而煎蛋都煎得幾好, 半生熟蛋, 黃又冇穿, 都幾好; 伴碟茄汁豆夠開胃, 唔錯; 五香肉丁公仔麵嘅肉丁份量都可以, 唔算特別多, 肉丁香香辣辣, 極惹味, 而麵質都煮得幾好, 煙煙韌韌口感唔錯; 凍檸茶嘅茶底唔靚, 茶唔多濃, 不過檸檬夠新鮮, 所以接受到啦! 總括黎講食物質素就一般, 服務又一般, 環境又係一般, 價錢就可以接受啦, 廿四蚊個餐有咁多野食, 收貨啦!, 加上今次師傅見唔到個寸咀阿姐, 所以食得過癮d, 或者仲有下次! 不過咁嘅水準係間間茶記都應該要有, 所以冇大驚喜, 笑臉比唔到, 有機會等師傅一定會試下佢個廚, 睇下得唔得先!