The Starred

营业中

休息中

見到$80晚市優惠好似好抵，點知中晒伏 。首先餐廳勁細，啲位勁迫，仲要播埋啲懶係古典嘅背景音樂，嘈上加嘈 。侍應好似未訓醒咁，首先上菜次序錯晒，湯同沙律都未嚟就上主菜 ，俾另一個侍應提佢先如夢初醒咁，但一句唔好意思都無 。個紫椰菜湯極度唔開胃，似紫米露+椰菜花混合體，味道當然係奇奇怪怪 。個沙律（其實得一種菜加一粒車厘茄）苦到完全食唔到，成兜無食到 。主菜⋯真係寧願去隔離快餐店食鐵板餐好過 。豬排同牛肉都煮得太耐，硬到用力咬先咬到，紅米飯淡而無味，食到最後幾啖無汁真係吞唔落。到甜品，本身WhatsApp book枱果時要求咗要寫字，講得清清楚楚想寫咩字，然後當日食飯前幾粒鐘又打嚟問寫咩字。最後甜品嚟到竟然係無寫字嘅！！同侍應講話之前request咗要寫字，得到嘅回覆係「下？」最後佢地睇返record再叫廚房出個有字嘅甜品俾我地，成個驚喜已經俾佢地ruin咗，依舊一句唔好意思都無 。廚房仲要好似慳住啲朱古力咁，啲字寫到鬼畫符 。總結，真係唔好貪平而幫襯 。食物難食，服務欠奉，環境嘈雜，根本係晒錢晒時間 。