回到味來 (已結業)

嗰日同個朋友去咗間旺角上樓嘅雞煲打邊爐，七點幾鐘入座，一坐低店員即刻行埋黎介紹佢哋嘅雞煲海鮮火鍋套餐，正價$248，早啲入座仲有平！一開波點左個雞煲先，店員提提我哋佢哋嘅雞煲比平時出面既辣，所以我哋都係揀咗小辣，幾分鐘之後已經上咗佢嘅前菜，金蒜鹹蛋蒸扇貝，扇貝好食，唔會蒸過龍，轉個頭雞煲已經到咗，一食落去雞煲已經有驚喜，我大大話話試過十幾間雞煲，呢間係我食過最好味嘅頭三位！講咗隻雞先，size夠大，肉質滑，冇雪味，配料方面，乾蔥、蒜頭、芫荽、香料落得好足，香味、辣味適中，話咁快兩個人已經食晒一隻雞，雖然呢個係任食火鍋，但係我哋忍唔住要點多一隻雞，因為好少有咁高質素。之後到個生猛海鮮拼盤，佢哋用嘅食材真係好新鮮，上菜時嗰兩隻蝦仲係咁郁，除咗蝦仲有花甲、蟶子、鮑魚樣樣都好鮮甜，新鮮依樣野真係冇得呃，個拼盤真係誠意之作！套餐仲包埋一碟本地手切牛頸脊，肉質高水準，冇渣冇筋位，正！其他火鍋配料我仲想推薦佢哋嘅韭菜餃同新竹米粉，都好好食！整體成餐飯二百幾蚊真係好抵食，地方坐得舒服，佢哋嘅店員服務態度超好，會主動介紹佢哋嘅套餐同食材，又有禮貌，下次一定會再黎！