伊甸 (已結業)

今日去官塘工業中心拎嘢就順便係呢邊揾食，之前去開四期嘅時候，見到小伊甸除咗改咗名，裝修都唔同咗就已經記低要嚟食！一入餐廳感覺好舒服，除咗淺色系同木系風格枱櫈，每張枱之間都有一定距離，減低壓迫感。另外餐廳其實分咗幾個區域，有chill住並排而坐嘅日式圓形草編蒲團位、可供多人聚餐嘅家庭式圓角長枱、面窗高腳櫈、半卡座配扶手木椅，以及我最愛嘅滿滿放鬆舒適感方形和室桌，老闆們係設計上面真係好有心思！寶島蛋餅 配 輕量沙律（$67）餡料今次揀咗鮪魚，蛋餅皮用咗麥蛋餅皮，更有麥香口感軟酥，新鮮沙律菜加上芝麻醬，感覺幾清新！台式香菇肉燥乾拌新竹米粉 配 涼拌小食（$77）夏天咁熱真係唔想食湯粉所以我哋揀咗乾拌米粉，，主食揀咗炸到酥脆鹽酥雞排，幼米撈埋甜肉燥好有台灣味！黑糖奶蓋波霸巴斯克芝士蛋糕（+$40）珍珠同奶蓋會分開上，可以自己淋上蛋糕面。黑糖珍珠入味又好煙韌，加上邪惡黑糖奶蓋，雙重黑糖味配少少檸檬味嘅巴斯克芝士蛋糕，超高質！奶蓋（鹽味）烏龍（+$15），伊甸嘅飲品係賞茶，香滑嘅奶蓋同濃郁嘅烏龍茶，質素絕對有保證，另外柚子蜜都好足料！