NUTTEA (旺角中心第一座) (已結業)

呢幾年開始興起堅果奶，買過黎試但太淡同唔甜，唔係好飲得慣，估唔到可以用黎整台飲。要左火龍果堅果奶蓋茶（＄38）佢有固定甜度，作為全糖星人本身都有擔心會唔會唔夠甜，但加埋奶蓋甜度啱啱好。火龍果夠清新，加埋一齊飲平衡翻。平時奶蓋就飲得多，冇諗過堅果奶蓋可以咁好味，冇咁膩之餘，令人冇咁有負擔，飲哂成杯都冇話飽到好濟嘅感覺。奶蓋夠厚，仲比埋隻好可愛嘅鏟仔比你食奶蓋。佢嘅堅果味好出，佢聲稱有五種堅果整成，尤其係榛子味最突出，有種食緊金莎/繽紛樂嘅感覺，少少嘅咸味更係令奶蓋冇咁單一。秋天嘅季節就當然要飲翻啲應節嘅飲品。要左新出嘅南瓜堅果奶（＄43），今次就要左全糖。佢係南瓜蓉打成，偶爾仲食到少少南瓜蓉，而唔係就咁落南瓜粉咁求其。飲落口感滑順。唯一失色左啲係堅果奶香味少少蓋過左南瓜味，南瓜味再重啲，加埋少少pumpkin spice 就好啦。店員夠細心，解釋埋點樣飲奶蓋。今次堅果台飲新體驗真係令我對堅果奶改觀。