1
我哋晏就嚟到，入到去先揀想食嘅價錢，加埋食刺身都係百幾蚊，咁抵梗係加埋佢啦！
入到去地方都幾大，仲有啲好正嘅打卡位，邊食邊影相玩，哈哈
有得打邊爐，又有得燒肉，食肉獸表示好滿足，都幾多選擇揀，非常好！
雖然出面有勁多調味可以任攞，但真係就咁食都十分OK ！食物都幾新鮮，唔會有雪櫃擺咗好耐嘅感覺，本身嘅調味都好夠味，但唔會死咸，真心高質喎，估佢唔到咁平咁有驚喜！
燒肉配啤酒，無得輸！仲要係任飲！
燒到咁上下，就出咗去攞香港人至愛！就係食返夠本嘅壽司同刺身！溫馨提示呢度除咗啤酒之外，仲有好多嘢任飲，食刺身梗係飲清酒或者梅酒啦，你冇睇錯，係有清酒、梅酒！任！飲！雖然係晏就，但好似去咗happy hour咁開心！
真係唔好俾佢停！繼續食下，打返個靚邊爐，仲有日式湯底可以選擇，同各款新鮮食材，好想講隻得意鴨仔幾好味，哈哈，有啲似魚片咁！！
食到差唔多就食返個甜品先！我最欣賞係佢有好多特別味道嘅雪糕，特別係港式奶茶同芥辣口味，奶茶個款淡淡茶香，唔會太甜，剛剛好，芥辣個款食到我哋笑咗出聲，真係好芥辣！但餘韻又有牛奶味，幾得意，出面放題我真係冇見過！
食飽飽，係時候飲啖茶解下膩，有超多款茶俾你選擇，仲介紹埋有咩功效，點解可以咁有心！重點！啲茶幾好飲，好香！朋友生日表示佢過得好開心，估唔到高質成咁，仲約下次再食！！正呀！
