醉藥雞 (啟志樓) (已結業)

早幾日出開荃灣，因為屋企人鍾意食雞就同佢嚟咗呢間幾出名嘅醉雞、藥膳雞專門店—醉藥雞。但食完只能講都幾失望。☄️藥膳湯底·醉雞米線（$58）米線偏淋，份量偏少。湯底藥材雖然份量十足，但只有少少當歸香味，稱唔上係一個藥膳湯底。醉雞用細碗連醬汁另上，但醉雞味只停留喺表面，未能夠做到入味。另外雞件斬得唔好，除咗骨碎外，亦有好多一枝枝嘅骨刺。☄️麻辣口水雞撈粉皮（$58）麻辣醬味道唔錯，粉皮爽口，炎炎夏日食佢會有種消暑嘅感覺。雞肉嚡口之外，同樣有斬得唔好嘅問題，令到成碗粉皮都充滿碎骨，食嘅時候真係要小心。☄️麻辣雞腎（$36）雞腎本身爽口，同粉皮用咗同樣嘅醬汁，食落都幾惹味。份量亦合格，足夠兩個人食，性價比算係高。⚠️以下純屬個人經歷同感受作為一間以雞為主打嘅餐廳，除咗每件雞都存在碎骨同骨刺問題，竟然甚至係有未斬開嘅雞件，呢樣對我嚟講真係死症。食完嗰晚我發現條脷係損咗幾個位。店員服務態度亦都幾差，希望店舖會改善以上問題。