鐵板一 (裝修中)

臨近中秋，成班女仔突然興起話要做節。行開銅鑼灣就走入登龍街睇吓有咩食。去到呢幢大廈好多餐廳都冇位。見呢間餐廳啱啱有位我哋就入去試吓新野。呢度價位唔貴，好適合我哋一班慳家女慶祝節日。初時見佢唔係特別貴，諗住一班friend食餐正正常常就算啦。點知入到去發現食物質素十分之有驚喜。首先係佢哋嘅餐酒十分之平，有紅酒白酒，味道偏fruity，好適合女仔飲。我哋點餐嘅時候發現佢哋有一個淨係海鮮嘅鐵板拼盤，有蝦有帶子有鮑魚。食海鮮最緊要食佢嘅蝦，因為蝦最可以反映出食物新唔新鮮。佢哋啲蝦好彈牙，食得出係新鮮蝦。另外不得不讚佢哋嘅牛扒，以呢個價錢來講嘅牛扒真係非常好食，食物質量高，連配菜嘅調味都一絲不苟，照顧得非常周到。係呢種偏平價位嘅西餐廳，好少食到連配菜都好食嘅菜式。最緊要係我哋食咗幾樣嘢食，味道都唔係偏鹹，食得到食物原本嘅鮮味。係個裝修太暗，食食吓飯睇手機有少少辛苦。不過以呢個價錢食到呢個質素嘅食物就算啦。