8號茶居 (順發樓) (已結業)

呢間8號茶居喺元朗有兩間分店，今日去擊壤路呢間。佢唔係一啲傳統茶樓格局，佢係比較新派既點心店。有卡位，位置闊落。茶芥每位5蚊，好合理。佢點心定價都幾經濟實惠。我中意佢有燉湯同煲仔蒸飯，同埋我中意佢有啲點心可以兩粒兩粒咁叫，咁就兩個人都可以叫多啲款式😬： 🔶️鵪鶉蛋燒賣 （3粒）（$27， 8.2／10） 幾特別！鵪鶉蛋燒賣係比較傳統既點心，唔係度度都有。 🔶️8號蝦餃皇 （2粒）（$19， 8.8／10） 兩粒裝😍皮薄饀靚，漲卜卜，好多蝦！ 推薦 🔶️蒜蓉粉絲蒸排骨（$29， 8／10）味道唔錯，有粉絲同豆卜吸哂啲肉汁，好味！ 🔶️鮑汁豬手（$36， 8.6／10）豬手炆得好焾好入味，鮑汁味濃。 🔶️鴛鴦鮮蝦網米腸（$35， 8.2／10）呢嗰腸粉幾得意，有兩款顏色，一隻綠色一隻橙色，個層脆網脆脆地，加埋腸粉軟滑同鮮蝦爽口，幾有層次。 🔶️海苔鮮蝦腐皮卷（$28， 8.3／10）香口脆皮。唔會好油。海苔卷都有特色。 🔶️鮮蝦菜苗餃（$19， 8.5／10）好大隻，鮮蝦足料。 🔶️南北杏菜干燉豬肺湯（$43， 8.5／10）欣賞佢呢度有老火燉湯。呢嗰菜乾豬肺湯好清潤，一啲味精都冇，如果有多啲豬肺更加好。