影片
更多
2023-10-15
128 浏览
8號茶居 8 Char📍元朗擊壤路17號順發樓地下H號舖呢日約咗中學師妹去元朗聚一聚，過往每次見面我哋都會選擇去屏山一間Cafe度食嘢，但疫情咁耐都唔太肯定嗰間餐廳仲有冇營業，加上佢食完飯有嘢做要即刻走，所以就揀咗間比較就腳啲嘅餐廳見面。喺元朗廣場隔離嘅巴士總站，附近有好多我成日都會見到，但食就一次都未食過嘅餐廳，本身諗住話玩吓懷舊去酒樓飲茶，點知連酒樓都執咗笠。行吓行吓，居然俾我哋見到一間主打食點心嘅餐廳，而且座位同一般茶餐廳冰室冇咩分別，感覺幾新穎，所以就同鍾意食點心嘅師妹喺度食咗個下午茶。原來餐廳主打就係做傳統點心，不過就會加一啲新派嘅元素落去，所以佢有好多嘅點心都係飲茶必叫嘅，但總會有一啲特別嘅新派元素，相信可以吸引到各個年齡層嘅食客。 💰$25雪山叉燒包 (2件) 🥯坐低喺度揀嘢食嘅時候，就見到店員不停咁出一碟碟雪山叉燒包，幾乎係每一枱都會叫至少一碟嚟食。我哋就當然都唔執輸啦，話俾你哋聽呀，其實我係唔食蒸嘅叉燒包㗎，但叉燒餐包呢我又幾鍾意食喎，係咪好矛盾！呢個雪山叉燒包面頭嘅包皮係好脆嘅，口感比菠蘿包個面仲脆，但就無特別嘅甜味，純粹係增加咗口感；裏面嘅叉燒餡料調味適中，叉燒粒
📍元朗擊壤路17號順發樓地下H號舖
呢日約咗中學師妹去元朗聚一聚，過往每次見面我哋都會選擇去屏山一間Cafe度食嘢，但疫情咁耐都唔太肯定嗰間餐廳仲有冇營業，加上佢食完飯有嘢做要即刻走，所以就揀咗間比較就腳啲嘅餐廳見面。
喺元朗廣場隔離嘅巴士總站，附近有好多我成日都會見到，但食就一次都未食過嘅餐廳，本身諗住話玩吓懷舊去酒樓飲茶，點知連酒樓都執咗笠。行吓行吓，居然俾我哋見到一間主打食點心嘅餐廳，而且座位同一般茶餐廳冰室冇咩分別，感覺幾新穎，所以就同鍾意食點心嘅師妹喺度食咗個下午茶。
原來餐廳主打就係做傳統點心，不過就會加一啲新派嘅元素落去，所以佢有好多嘅點心都係飲茶必叫嘅，但總會有一啲特別嘅新派元素，相信可以吸引到各個年齡層嘅食客。
[價錢 Price]
💰$25
雪山叉燒包 (2件) 🥯
坐低喺度揀嘢食嘅時候，就見到店員不停咁出一碟碟雪山叉燒包，幾乎係每一枱都會叫至少一碟嚟食。我哋就當然都唔執輸啦，話俾你哋聽呀，其實我係唔食蒸嘅叉燒包㗎，但叉燒餐包呢我又幾鍾意食喎，係咪好矛盾！呢個雪山叉燒包面頭嘅包皮係好脆嘅，口感比菠蘿包個面仲脆，但就無特別嘅甜味，純粹係增加咗口感；裏面嘅叉燒餡料調味適中，叉燒粒唔會過瘦過肥，而且放咗一陣先食都係熱辣辣！
[價錢 Price]
💰$19
蟹籽燒賣皇 (2件) 🥟
又到我做大胃王嘅時間啦，蟹籽燒賣皇一籠係有兩件嘅，因為師妹唔太鍾意食有蝦嘅燒賣，所以我就一人K.O.咗兩粒！佢嘅燒賣皮唔係一般黃色嗰種嚟㗎，而係好似鵪鶉蛋燒賣嗰種白色皮，裏面嘅蝦肉同豬肉份量十足，而且非常彈牙，不過又無食到肥豬肉喎，個人認為好抵食！
[價錢 Price]
💰$27
老干媽蒸鳳爪 🐓
蒸鳳爪幾乎都係飲茶必叫㗎啦，但呢度嘅蒸鳳爪呢就有個twist㗎喎，有別於一般嘅豆豉醬，佢用咗味香帶微辣嘅老干媽嚟蒸，估唔到真係別有一番風味。最欣賞佢嘅地方就係佢份量好大，除咗件數多之外，每隻鳳爪都大大隻，絕對唔會好似小兒麻痹咁，而且好入味，相信即使食開傳統點心嘅長輩都會鍾意。
[價錢 Price]
💰$15 (1件)
雪茄春卷
大鄉里嘅我，如果唔係早幾日喺IG睇其他Foodie介紹過雪茄春卷，真係唔會知道原來係雪茄造型嘅春卷。不過呢度嘅雪茄春卷比我見過嘅相片更粗更大，裏面嘅餡料非常足，有好多大大粒嘅蝦肉，爽口彈牙！個人認為裏面嘅醬同餡已經好夠味，唔太需要再額外點沙律醬嚟食。由於叫到成枱都係點心，我哋係食晒熱辣辣嘅蒸點先開始食春卷，但佢依然脆卜卜，而且如果係細食啲嘅話，基本上叫一條兩份分就好足夠啦！
[價錢 Price]
💰$27
香煎臘味蘿蔔糕 (3件) 🫓
廿零蚊食到三大件煎得香脆嘅蘿蔔糕，真係好抵喎！佢唔似一般食到嘅蘿蔔糕咁成口粉，而係真係食到有好多大大粒嘅蘿蔔，同時亦有少量臘腸點綴，點辣椒醬、甜醬或就咁食都好滋味。
[價錢 Price]
💰$49
青薑蓉蒸雞飯 🐓🍚
北菇蒸雞飯相信大家點都會食過啦，但係青薑蓉蒸雞飯，就連我都係第一次食咋！開頭我哋仲搵緊枱頭有無豉油，因為一般嘅做法都係要落啲豉油落去蒸飯度撈勻嚟食。後尾先知原來啲青薑蓉好濃味，而且油分十足，直接撈落啲飯到食已經唔需要再額外加豉油啦。佢嘅滑雞係連皮嘅，真係滑捋捋而且無骨，脂肪比例唔會太重，鹹鹹香香嘅調味非常啱我口味。而且佢嘅份量都唔細㗎，我哋各自都食到兩碗仔飯，又係一抵食之選。
[價錢 Price]
💰$6/位
如果揀一般普通嘅餐，茶位每人只係$6。我哋揀咗濃普洱，食比較油膩嘅炸春卷時，特別解膩，飲多兩杯可以減低飽滯感。
张贴
