木玥巷 (已結業)

係屯門返工個陣好鍾意去木玥巷，而加元朗都有分店啦，是日黎開朗屏就食佢先。元朗店比屯門店大少少，個人覺得佢位於富來花園嘅地址都幾易搵，西鐵站一出落條天橋就到，易搵過屯門店啦。坐低睇睇餐牌，元朗店有炒粉麵飯喎，多左選擇，其他小食同飲品就同屯門店一樣，既然有新野梗係試下啦，就叫個炒米粉先。午餐包一杯普通飲品，但可以加錢轉特飲，就轉左做白桃桂花烏龍清茶，鍾意佢個種清香茶味，同埋佢無糖唔甜啱口味。等左一陣份午餐就到了，點的係蟹肉金絲炒新竹米粉，試下新野嘛。賣相幾靚喎，呢個咪就係傳說中嘅黃到金，哈哈。米粉炒得爽口唔油膩，入面有一絲絲蟹肉同瑤柱，鮮味帶鹹香，炒得好好味呢。伴碟有醬瓜，甜甜地咁囉。覺得無乜肉又加左一份鹽酥雞，即炸的香噴噴。雞都幾大件，一碟約有六至七件。外面炒得香酥，內裏雞肉嫩滑，好好味，不過即炸起十分熱，食時小心燙咀。好味好味，唔怪得午市咁多人等位。