七本(居食屋)日本料理 (已結業)

八點同女友係旺角周圍行，唔知食咩好，見門口位姨姨笑容十足於是隨遇而安咁入咗去呢間餐廳食，門面裝修正正常常無咩特別。因為小弟有啲選擇困難症，所以都揀咗好耐，店員都算有耐性解答同無催落單。最後揀咗招牌地獄海鮮拉麵，見佢講到話激辛，而小弟又十分嗜辣如命，所以就揀左佢，女友就揀左海鮮鍋飯，再加特價十片三文魚刺身。上菜好快，首先上左三文魚刺身，厚度適中，肉質肥美，鮮味亦夠，呢個價算物超所值。見佢啲刺身咁抵食，諗住接下來嘅主菜都應該唔會太差啦，只不過........兩份主菜同時上，第一次見地獄拉麵啲湯係豬骨湯咁嘅色，紅都唔紅下，本想叫店員查查單，睇下係咪落錯單，但女友身先士卒盛了口湯試一試，真係有辣味，我試下味果然有啲辣，咁都算無黎錯嘅，不過個湯真係乜海鮮味，再試下啲海鮮配料都係無乜鮮味，量多都無用，不過都唔一無是處嘅，麵質就OK，口感都算彈牙，算係沙漠中嘅綠洲啦。另外個份就係海鮮鍋飯賣相都OK，但食完全無海鮮味，純粹係蛋炒嘅味，啲海鮮配料又係無味......好不容易食晒埋單，如果齋食刺身黎講OK嘅，但可惜我地個飯同麵真係完全唔合格。