高街麵霸 (已結業)

今日咁岩係附近做野，同事們話想試下呢間車仔麵，之前聽聞我偶像sammi都有黎食架，咁梗係要試下啦！午飯時間坐滿晒人，大部分都係附近返學嘅學生。等位等左5分鐘到，畢竟係食車仔麵，人流比較快。鋪頭位於高街舊樓地下，樓底好高，相信係以前嘅閣樓。車仔麵都好多選擇，麵底$11起，除左平時食嘅米粉河粉油麵，可以加錢食刀削麵(+$3)或手打稻庭烏冬(+$15)。每碗最少叫三個餸，每樣$9，我揀左普通車仔麵個幾款餸，魚蛋豬紅蘿白酸齋河粉。湯底揀左腩汁，加少辣咖哩汁，魚蛋細細粒好似細個食個d咁，都幾彈牙，豬紅都幾入味，但蘿蔔真係太淡唔入味！酸齋係貼心地另上，味道幾好唔算太酸，不過真係好大份，有d滯！我地都有試其他食家推介嘅炒腸粉，賣相幾好，不過只係加左蛋炒嘅腸粉，再靚靚地加各樣醬汁，$30幾蚊略貴呀！整體感覺算唔錯，食完都唔算好口渴，只係車仔麵黎講，價錢略為貴左少少。