Oasis Corner (已結業)

之前農曆新年食多左，聽朋友講觀塘有間有營食肆唔錯，就決定去食下。餐廳環境好繽紛，令人心情豁然開朗。我點左個健康沙律配慢煮雞胸，見到餐廳有冰滴咖啡，就點咗黎試吓。朋友就點咗個豪華美式All Day Breakfast, 以及日本抹茶鮮奶咖啡。冰極咖啡用玻璃樽裝住，個樽設計好靚，咖啡味香濃，係唔錯嘅冰極咖啡。至於日本抹茶鮮奶咖啡，綠茶味非常濃郁，而且冇落糖，非常健康。健康沙律有沙律菜、車厘茄、青瓜、藍莓、大啡菇、蛋配慢煮雞胸，所有蔬果都好新鮮，而且切嘅size啱啱好，適合入口。大啡菇暖暖地又略帶牛油香，隻蛋煎得金黃，食落唔會好油。慢煮雞胸火候控制得非常好，可以鎖住肉汁，成功保留食物嘅原汁原味。沙律醋酸酸地，加落去一齊食好開胃。至於豪華美式All Day Breakfast就有車厘茄、大啡菇、黑松露炒蛋、煙肉、腸、自製薯角、藍莓、沙律菜、牛油果、車打芝士、牛角包、黑毛豬以及黑松露蝦，黑松露炒蛋非常香滑，而且落左好多黑松露，自製薯角炸得非常香口。牛角包係廚房即時製作以及焗，等左十幾分鐘，新鮮出爐熱辣辣，咬落外脆內軟，非常高質。總括而言，餐廳食材新鮮，製作認真，而且營養均衡，不愧為營食肆。