頑固壽司 (已結業)

近年日本來香港開店嘅過江龍餐廳越來越多，頑固壽司亦係其中一間，佢都開業了一段時間，一直以來算比較低調，而我又未試過去，所以趁母親節帶屋企人來一試！我爸爸話十幾年前去日本公幹已經係大阪食過頑固壽司，印象中都係走性價比高嘅路線，嚟到香港價錢定位就較高，我地每人叫了一客壽司拼盤十貫午市定食 ($248)，定食附送前菜、茶碗蒸及麵豉湯，比起同類型餐廳價錢算係中上。雖然價錢算中上，但我只可以話咁嘅食物質素絕對係值得。刺身壽司方面有拖羅、三文魚、帆立貝等等，另外仲有燒鰻魚，以及甜蝦海膽軍艦、松葉蟹軍艦、呑拿魚卷三件，旁邊兩件開頭以為係蛋糕，食落係咸嘅先發現係玉子燒！刺身全部都非常新鮮，個人覺得最好味嘅係兩大軍艦，係香港要食到真係鮮甜而唔腥嘅海膽並唔容易，但呢度係絕對做到，蟹肉更竟然係完全無落調味，就咁個蟹肉鮮味已經夠晒滿足味蕾！呢度壽司嘅size偏細，但刺身厚切，而且刺身嘅溫度偏暖，唔會好似出面咁雪得太凍，加上壽司入面已經夾好wasabi唔會另外點，豉油亦要用佢特制嘅掃塗上刺身面，唔會沾到壽司飯，以上種種都見到呢度嘅做法相當正宗，令我有覺得好似返左鄉下嘅感覺！