岩鹽日本料理 (利舞臺廣場) (已結業)

Peak season OT ，一個人鼠出去嘆個晚飯。話明係嘆梗係要食得好少少，所以揀咗呢間以打工仔晚餐角度嚟講都算中高級價位嘅日本餐廳。點咗一客「燒鵝肝澳洲和牛釜飯」$168，再加一串「燒牛舌」$30 同埋「汁燒墨魚串」$20。「燒鵝肝澳洲和牛釜飯」都幾有儀式感，一上菜，店員就擺低個沙漏，還漏完之後先可以打開釜飯蓋，再淋上醬汁攪勻食。呢個set仲跟幾塊魚生、麵豉湯、沙律同埋漬物。魚生有三文魚、帶子同埋一塊唔知乜嘢。味道方面坦白講，係好鮮甜新鮮嘅，可惜份量就相當有限，到喉唔到肺，唔緊要啦，個飯先係重點。打開個飯蓋熱氣騰騰嘅香味撲面而來，淋上醬汁再攪勻，個飯嘅份量足足可以𢳂出三碗，份量好鬼足，釜底仲有少少飯焦，成個飯仲混入菇呀、栗子呀，撈埋食好甘香可口。至於燒鵝肝，得一塊，好彩算厚切，而且油脂嘅香味無得頂。澳洲和牛就4-5塊，都唔薄，本身睇落以為有啲硬硬要出啲牙力，但食落發現其實幾嫩口，而且肉汁喺齒縫間滲出，幾正斗。串「燒牛舌」就好難有得輸，汁多味美爽口。串「汁燒墨魚串」就一般般喇，口感係幾滑溜嘅，不過就比較淡味。