千府·居食屋 (已結業)

今次搵食專登搵到去勝利道，因為被呢間以富士山為主題嘅日本餐廳吸引咗。掛住日本嘅人都可以黎呢度，嘆住日本菜邊思鄉！一坐低，員工就會上餐前小食，爽脆嘅瓜條沾上微溫嘅西班牙鯷魚醬，開胃得黎又別有一番風味。點埋兩支黃富士「柚子」梳打同赤富士「葡萄」梳打，展開我地嘅晚餐。鐘意蟹膏嘅話必點松葉蟹膏豆腐，入口蟹膏味好濃，豆腐超滑，似食緊布甸咁，加埋啲三文魚籽，鮮味更突出。千府火炙盛合，分別有經燒香過嘅帶子、Toro、三文魚，左口魚邊壽司，壽司飯大小同酸味適中，滿意。清酒煮日本大蜆，大蜆肉質飽滿同新鮮，完全唔會韌，湯底味道仲非常清甜又帶點酒香。千府將大阪燒味道都唔錯，二人食剛剛好，如果可以脆少少就更佳！餸酒的話，可以點原條燒花魚一夜干，咸香味道出色，肉質好滑，忍唔住一口接一口。串燒方面，試咗紫蘇梅子大蔥雞肉串、日本黑豚腩肉，明太子手羽，3款都好滿意，夠晒入味，記得趁熱即燒即食！最後，我地仲點咗宇治抹茶十勝紅豆布丁，上碟好似富士山咁超有心思，布丁超滑，加埋飽滿嘅十勝紅豆，完全中和咗抹茶嘅苦澀味，值得一試。