康記粥店 (已搬遷) 新店位置

現時在街上的店舖，想食一碗正正常常的粥，經已越來越難。都唔知試過幾多次，出街食完粥，個口會好鹹，或者喉嚨唔舒服，又或者係上下嘴唇邊有一種火燒的感覺。無他，因為有味精，或者係硼砂。周不時會到此小店食粥，因為食完除左冇以上的感覺之外，仲有一種舒服的感覺。店子的地方淺窄，舖內得三張抬，其他的都在舖外；又冇冷氣，冬天仲好一點，夏天其實係食到一身汗。但點解都會來食？因為我真係來食粥。粥底係心機之作，綿度適中，食完的感覺真係好舒服，老闆係一早天未光就開始煲，淨係呢一點，而家都越來越少。其中，白粥、豬潤、豬肚、艇仔、碎牛等，都食過，好。至於其他的食品，腸粉是有特色的，值得試；炒面唔會落太多豉油，我比較鍾意。其他仲有豆漿、炒米、蘿蔔糕、油墨菜都試過，OK。油器則睇你啱唔啱時間喇。最後係價錢，老實講，係超值。同我老婆兩個人食到捧住肚，都係每人三、四十蚊。老闆兩兄弟兩家人同老爹都會幫手，其實係有家庭感覺。但係舖租昂貴，又賣得平，真係唔知佢地頂唔頂得順。未來過，一定要來試試。