天下茶屋 (福榮街) (已結業)

近來好少去黃金附近食肆食嘢，因為食嚟食去都係嗰幾間，今晚見到呢間未試過又無咩人，就走咗去試下。自己劃紙點餐，餐單都幾易明，點咗激辛咖喱吉列豬扒飯、海鮮雜錦烏冬、豆腐魚肉雜菜餅、炸蠔、寒天柚子烏龍茶，蘋果鮮果乳酸。老公平時食得到中辣程度，但係呢個激辛佢都話有啲辣不過好過癮，會想繼續食嗰種，豬扒炸得好脆，肉雖然未算好juicy 但唔係柴皮唔韌，飯量同汁剛剛好，唔會出現飯少汁多情況。至於我食既烏冬，我㨂係黑松露忌廉薯蓉湯底，我覺得超好味，薯蓉唔多所以嗰湯底唔太杰，但可以做到汁掛烏冬，烏冬好彈，海鮮有蝦，帶子和鳴門卷，料算少而且蝦係成隻連殼，雖然好貼心俾隻碗仔放殼不過，食得少少麻煩。炸蠔好多日式餐廳都有，可能因為人唔多，即炸所以幾好食。不得不讚，豆腐魚肉雜菜餅，真係好食，無牙都食到，好霖但唔會散，椰菜絲唔硬，絕對可以encore。兩杯飲品都唔錯，乳酸裡面有少少蘋果肉連皮，好靚，味道唔似用粉沖出嚟，真係似用鮮果整。