越南米紙 (已結業)

中午去郵局寄嘢，順便食個午飯，見到郵局對面新開咗一間越南菜，入面都幾旺，就排隊入去試一試。一個人比較易等位，等咗一陣就有位。佢地午餐有越式湯河、檬粉、飯等等，我就叫咗個生牛肉河；而飲品可以升級做特飲，特飲款式好多，有沙冰、花茶等，啲飲品名幾趣緻，最後我揀咗「青黃不接」，即係青瓜+菠蘿沙冰。生牛肉河：湯幾夠濃，牛肉都幾有牛味，加上香草，加添了一點層次，食起上嚟帶點清新。「青黃不接」沙冰：青瓜的清新加上菠蘿的甜味，味道爽口，不會只有甜味，而且用青瓜做沙冰感覺幾健康。店舖座位不多，但勝在夠光猛，都幾舒服，下次趁下午茶少人啲嘅時候再嚟坐下飲杯嘢都好似唔錯！