HAND3AG (K11購物藝術館) (已結業)

Hand3ag呢一間三文治店位於尖沙咀k11, 地理位置十分方便 尖沙咀地鐵站 唔駛五分鐘路程已經到到，餐廳十分寬敞明亮。 入到去睇完menu直接喺收銀處買餐，買完餐就可以入去裏面坐 。等亦都唔需要等好耐十分鐘就已經可以拎到嘢食。今次試咗佢嘅慢條斯理食肉獸鐵板三文治同大隻水手鐵板三文治。 佢可以加錢升級做套餐, 價錢一啲都唔貴, 就已經可以包多一個小食同飲品 , 兩個都特登升級做套餐 ，一個要沙律另，一個要薯條加大，兩個人share 已經好足夠，而且套餐仲包嘢飲，我嗌咗紅沙冰同英式早餐茶， 另外叫咗一個小食叫炸牛油果配芒果醬。 不得不讚佢兩個三文治都十分好食， 麵包皮烤到好脆 ，而佢啲肉亦都鎖住曬所有肉汁 ，咬落去嘅時候再加埋其他配菜，成個口感好豐富，而且佢將所有嘅三文治都切一半，所以其實可以好好咁同朋友一齊share ，兩種味都可以試到。 佢嘅薯條係粗身薯條，外脆內軟，十分好食 。至於佢嘅炸牛油果亦都炸到好香脆，一咬落去牛油果味濃沃，配芒果醬感覺好fresh。 最後配埋佢嘅士多啤梨紅椒沙冰 就好perfect ，沙冰係用唔同嘅蔬果整成 ，味道清新，而且十分健康值得推介。