百悅軒

营业中

休息中

女兒朋友提起自己屋企商場酒樓有雞煲翅做優惠，好味又抵食，今日就叫我陪佢過嚟試吓。百悅軒裝修簡約，地方乾淨企理又夠大，做街坊生意為主，所以價錢都係街坊價，提供懷舊小菜、明爐燒味等，食物質素都唔錯，深受大眾歡迎。鄰近屯馬綫，又有停車場，外來客入嚟食都好方便。招牌濃湯雞煲翅做推廣優惠，價錢平咗一大半，寫明足4兩翅，上枱見到都份量十足，用火熱住唔怕咁快凍左，金黃色的雞湯非常濃郁，味道鮮甜，內有半隻雞，肉質鮮嫩，上面有一大排翅，口感彈牙。西蘭花炒蝦球帶子：炒得夠鑊氣，西蘭花爽脆清甜，蝦球帶子鮮甜爽口。脆皮炸大腸：豬大腸炸得香脆可口，清新嘅菠蘿中和返豬大腸嘅油膩感, 兩者配合十分完美。椒鹽魷魚鬚外皮金黃酥脆，內裏嫩滑腍身，加埋椒鹽，十分惹味。酒樓向每位客人送上飯後甜品，非常貼心，綠豆沙煲得夠火候，甜度啱啱好。