稻埕飯店 (K11購物藝術館) (已結業)

見到商場開咗間新嘅台灣餐廳，屬於茶木集團旗下嘅新品牌。好鍾意飲珍珠奶茶嘅我一定要試吓啦，個滷肉飯好抵食$28，而且好足料，個滷水糖心蛋又好入味😋但我梗係唔會淨係食滷肉飯啦。叫咗佢個九層塔蟹肉炒蛋，都好好食嘅，不過我鍾意九層塔嗰個味道，如果再落多啲就更好啦。仲叫咗個鹽酥紅麴豆乳雞，職員介紹呢嗰菜做功都幾複雜嘅，所以就諗住試吓，點知呢個就令我失望啦。佢係有紅麴味嘅，炸完之後再用豆乳炒，不過豆乳味就食唔出啦，仲要呢碟雞有三份二都係骨嚟嘅，所以個味整得幾好都冇用，我食唔到啲雞骨㗎嘛，食落去淡淡骨真係食得好辛苦 跟住叫咗杯今期好hit 嘅400次咖啡，不過飲慣手調咖啡嘅我，真係飲唔慣茶餐廳嘅咖啡粉，飲完返去仲胃痛，嗰啲咖啡苦澀味真係好難頂。另外買咗杯黑糖珍珠奶蓋，呢杯就好飲啦，珍珠夠彈牙，同埋黑糖甜度啱啱好，值得一試。