華苑潮州閣

营业中

休息中

聖誕又到，今年又係成堆Gathering 排曬隊，見之前試過的華苑開左分店，一於試下。5個人叫到成檯都係，無辦法la，聖誕係開心d 叫多d 。新店環境比舊店靚左好多，而且大左差唔多一倍，見門口全部都係明星相，相信都係明星食店。先上左個燉湯，足料好味wor。食得潮州野，鹵水拼盤呢d 必叫啦，飯店個姐姐話鵝肝好食推介，但我地唔食內臟，所以最後係鵝片拼鵝掌，黎到碟頭都算大碟，下面墊底係豆腐，因為鹵水汁好入味，豆腐入曬味，正！鵝片就正常潮州店表現，反而鵝掌有驚喜，好味！之後仲有牛丸湯，牛丸係手打的，好新鮮，牛味超重。雙拼酥炸蝦棗拼蟹棗，蝦棗ok，蟹棗下次可以唔要。炸蠔餅一定要試，個蠔完全唔腥，通常炸蠔餅會好油，呢個唔知係咪因為煎關係而唔係真係成兜油去炸，好食過平日出面果d。 最後上埋甜品，褔果薑薯糖水開始以為係蕃薯糖水d friend，點知個薑薯咬落個質感好似馬蹄，好清甜，無蕃薯糖水咁甜。反沙芋頭有水準，出面層皮沾滿糖沙，有位朋友不太好甜食，我食左總共3舊，好邪惡呀。滿足一餐，聖誕完左。。。又開始要減返下。