趣園麵家 (已結業)

回想返，原來都有好一段時間冇去過麵家去食一碗雲吞麵。趣園麵家，喺疫情時開張。佢開張後第一個星期就入咗去食野。當時我都未開始記錄低平時既搵食足跡。只記得碗雲吞麵有好多蝦子，有韭黃，麵好彈牙，雲吞足料。係我認知既傳統雲吞麵。之後間唔中都會去翻食。今日再入去聽到街坊講，原來佢地做埋今個月就唔做。又一單敵得過疫情，敵唔過租金既例子。諷刺嘅係，咁啱嗰個商場新開咗間連鎖粥麵店。晚飯時間人龍不絶。究竟連鎖食肆啲嘢太好食，定係麵家小店真係冇咩生存空間呢？今晚，同樣叫咗一碗蝦子雲吞麵，本身想叫埋炸鯪魚球，但因為結業人潮，所以沽清。唯有用相片好好咁記錄一下呢一碗麵。希望之後再有機會可以一嘗。蝦子雲吞麵湯頭清澈清甜，配搭韮黃，蝦子，令到味道提升咗唔少。雲吞大細適中，餡料調味夠。蝦肉新鮮爽口。麵身彈牙，冇鹼水味。同第一次黎食一樣，碗雲吞麵係我認知應有既味道。喜愛度(5分為滿分): 4.5