麵屋豚豚拍子 x 辛味屋 (已結業)

近排聽朋友講話試左間拉麵幾好食，咁我就約埋女友人去試下啦，一去到都幾多人排隊，咁我fd應該冇老點我，間野係有d料到。等左15分鐘左右就入得，四周環境好光鮮，同埋個肥仔侍應好好，問我地想要水定茶，感覺幾好，平時都係得酒樓呀姐先會問飲咩茶😂，之後睇menu掙扎左好耐，決定唔到叫豚肉咖喱拉麵（個名好似係咁）定海老拉麵好（因為睇圖都好吸引），最後擲公字叫左咖喱果個，女友人叫左吉列豬排咖喱烏冬，仲叫左炸豆腐同炒魷魚。等緊食既時候，聽到隔離位個小妹妹同呀媽定唔知家姐講話好好味，我有少少驚，因為我對碗拉麵太高期望，驚跌落地會痛，同埋我本身對拉麵麻麻地，跌得再痛d，咁我就繼續抱住賭仔心態等食...一上菜，嗯...兩碗野個樣幾靚，試淡汁...不得了！咖哩味濃得黎唔覺得肥膩，個汁做到掛麵效果，個麵底煮得岩岩好，配合埋個汁簡直係天衣無縫，入選到我年度十大最好味食物之一，連平時嘴尖既女友人都食到舔舔脷就知佢果碗都好好食，平時細食既我地都清哂枱，真係唔係好多間食店做到，依間絕對係我今年食過最好食，沒有之一既拉麵鋪，不負責任咁講，係香港既拉麵鋪黎講係無對手，唔信就去試下！