金鳳大餐廳 (山林道) (裝修中)

唔知你地係咪一樣，有時都會同啲朋友去啲舊式扒房食下鐵板餐？我就好鐘意懷愐下舊風情，好old school好正～今次就同朋友去尖沙咀山林道呢間金鳯大餐廳 呢度嘅扒餐全部都會配埋餐湯、牛油餐包同餐茶。餐湯有兩款白湯嘅粟米忌廉湯，紅湯嘅羅宋湯。前者夠唒Creamy，後者用料十足，味道夠唒濃，口味偏辣。餐包會用微波爐加熱，所以會保持溫暖，包都好軟熟，加埋牛油一齊食就啱啱好。我哋呢次點咗佢哋嘅招牌牛柳同埋美國德洲頂級西冷。佢哋上餐會用鐵板，職員會喺我面前淋上醬汁，醬汁有蒜蓉同黑椒兩款，醬汁淋落熱辣辣嘅鐵板嗰下好有懷舊港式扒房嘅風味。蒜蓉汁本身蒜味都好濃，如果覺得唔夠仲可以加錢額外添加生蒜，令蒜味更濃更香。西冷牛扒好大一塊，生熟度控制得宜，中間仍能呈粉紅色，肉質軟腍。牛柳就有兩大塊，肉質嫩滑。牛味好濃，加埋惹味嘅黑椒，味道好夾。喺牛扒嘅下面仲有粗身嘅薯條同爽脆口感嘅脆肉瓜墊底，索唒啲肉汁同醬汁，勁好味。