王記糖水 (已結業)

其實喺附近住嘅都知呢度好出名：平、靚、正，但嚟『王記糖水』，首選係嚟食粥。吓食粥？無錯，你無聽錯，我無講錯；係食：陳腎蠔豉豬骨粥。呢度所有糖水同粥都分大/細，相差兩個大洋，粥只獨孤一味「陳腎蠔豉豬骨粥」$19大碗。第一口粥你會嘗到前所未有嘅味道，係難以形容嘅鮮香，粥料亦好食，有香爽嘅陳腎，香濃蠔豉味，最難得係啲排骨肉仲好甜、好「lum」，幾乎想問可唔可以爭係要排骨呀！？再打包碗渣泎、腐竹糖水或杏仁疍白返歸慢慢嘆，桑寄生蓮子茶就有啲「硤硤地」。呢粥真係第二度食唔到，唔係幫佢誇大，試過你就知；難怪蔡瀾都讚好啦。