森戶 (河背街) (已結業)

今日又黎到荃灣搵食，穿過大街小巷，搵到呢間日本菜小店，起一起底原來都有幾間分店，就試試佢。餐廳裝修簡約，木系色調加埋刺身吧枱，帶出日本既風格。睇睇餐牌，價錢就同平時既日本料理店差唔多。我地叫左一份$198 特上北海丼同埋12件自選壽司，仲叫左份燒牛舌。先到既係岩岩即燒既鹽味牛舌，賣相好，熱辣辣咬落去彈牙，香口，鹽既調味岩岩好，非常好食！再黎既係海鮮丼，刺身既色澤睇得出係新鮮貨，每一片魚生都好有份量，加埋個調味上佳既壽司飯，每一啖都有豐富既口感同味道。睇下呢塊大拖，係呢碗丼既MVP，極濃既油脂味仲可以keep到一段時間。即叫即握既自選壽司上枱，我個人鍾意食魚類，所以全部高檔既白身赤身都揀哂，再加幾款壽司控必食既帶子，赤蝦等等。每款壽司都非常出色，手握既壽司飯夾落唔會鬆散，每塊肉既大小當然都非常慷慨，好滿足既感覺。特別想提呢款火炙左口魚，係我既最愛之一，火燒既焦香將魚脂爆出黎，令到成舊壽司充滿濃厚既味道。