旮旯 (已搬遷) 新店位置

D留言太兩極，抱住平常心黎試，睇下伏定唔伏😂買左3樣野：麥糍+葛餅+抹茶卷蛋我帶返屋企同細佬食，三樣野都再即放雪櫃雪返凍少少。先打開麥糍個盒，見到抹茶隻色好綠，以為加左色素，但最後食落口時，食得出係濃濃抹茶味，d皮仲係軟既，之前自己整過糯米皮，雪完都比較硬，好好奇佢地個製皮食譜。（雲呢拿味更正，似雪米糍果隻皮）之後食葛餅，我細佬話似水，因為口感冰涼水嫩，幾清淡，連食三件不膩。我不嚐甜，店主俾左包糖漿我只係落左幾滴，都唔會冇味，因為外層既黃豆粉d烘烤味好夾，同我去日本食果隻正宗葛餅無異。最後試抹茶卷蛋，好怕食唔落，厚切一大件，我同細佬諗緊點叉，最後都係分幾次大大啖擺入口，連埋吉士有陣蕃薯味mix紅豆，令抹茶卷既茶味變得fresh，最後2人KO。下次試埋蕃薯卷蛋。中肯d黎講，真係幾好食，整體我地都好滿意，無伏到，甜品小店黎講，價錢可接受。下次想試埋飲品。