勁好味大碗麵 (已結業)

星期日返完教會差唔多成2點，落太子搵食，一支公，搵食無要求，隨意搵算吧喇，一句講晒平靚正就得！見到哩間嘢叫“勁好味大碗麵”，茶餐廳仔格局，買車仔麵，鋪面又貼晒雜誌介紹嘅文章，不過，稍為吸引我係門口張易拉架海報，下午茶$17，兩款餸，加嘢飲，所以點都晌花園街兜多個圈等 2:30啦，順路上埋新世紀廣場嘟地鐵飛慳2蚊，惠康話齋慳得1蚊得1蚊！下午茶即係下午茶，先前經過客唔多，依家差唔多坐滿，你話丫，香港人都好識搵位慳番D！速戰速決，兩餸要沙爹牛同魷魚鬚，配油麵（好耐無食過）嘢飲要豆漿（健康D嘛，但係個麵又要唔多健康嘅油麵，香港人就係咁矛盾），都幾大碗吓，份量都算係咁喇，至於味道都OK架，不過用個“勁”字都明知係誇張D啫，話晒收你$17蚊咋，你想點！