仁氣居食屋 (已結業)

同女友在尖咀shopping後，特登行過去尖東幫襯呢間野。入去之前睇過menu，食物種類雖然冇咩特別，但係睇落都有唔少客人，要求唔高既，應該都可以一試。同個侍應講我地唔要任食套餐，因為任食既都唔係想食既野，點知一坐低後就知道lei野︰1) 侍應騎呢- 個女侍應一身日本造型，講野快而唔清楚，猛sello的食物，話邊o的邊o的新鮮，一定要試，邊o的又好抵食，唔可以錯過。唉，佢咁煩，我都唔理佢喇，自己叫番想食既，跟住佢就黑面。2) 食物質素差- 我同女友叫左一o的魚生刺身，黎左之後發覺好唔對路，o的食物望落去唔新鮮不特只，仲差過o係迴轉帶上任食果o的，真係非常失望。3) 侍應訓練質素參差- 又講番o的侍應，其實唔係個個都serve得唔好，只不過係咁o岩serve我果枱既唔多掂。又有一個例子，就係其中一個侍應上菜果陣都唔知道果樣食物叫咩名。果樣叫酒煮大蜆，佢就話「酒煮唔知..咩蜆」。o係咁既氣氛下，頓時冇晒食慾。總之一句講晒，我地唔會再去呢一度。果一日我寧願o係上面食串魚蛋跟住過麥記食包好過。