德記潮州菜館

营业中

休息中

咁啱入开西环，又唔知边间好食，就求其揾间就脚嘅，点知咁就揾到一间会令我再返嚟食嘅舖头。去到已经八点，见门口有人都惊要等位等好耐，点知两个人就啱啱好有枱，真好彩。由于得两个人，今次试嘅菜式并唔多，但款款都令我几满意。蚝仔粥，配料味道唔会太重太多，蚝仔唔会煮到成只实晒，又够多，都有好多算系巨型蚝「仔」，整锅粥相当清甜唔重口味。蒸蛏子皇，蒸嘅时间啱啱好、易咬又有少少爽，蒜蓉粉丝都够多。例牌卤水鹅，味道唔错，垫底嘅豆腐都好食，但唔知点解鹅肉好林，林到冇咗嚼劲，有啲失败。萝卜烙，我愿意为呢碟菜再返嚟。咁大个人第一次食呢道菜，外层炸得香香脆脆，萝卜条又够甜，加上啲配料令到成旧嘢更香口，好好食。另外侍应嘅态度大多值得一赞，好积极、有礼貌，唔会好似其他餐厅啲侍应咁，望到你举手即刻拧歪面当睇唔到。下次同朋友再嚟试多啲菜式，尤其系见到啲蚝饼好似好松脆，希望唔会令我失望。