囍囍小廚

营业中

休息中

去完旅行返到嚟香港，想食返啲香港嘢，大排檔就真係走唔甩㗎啦。見到呢間裝修得幾新潮，又可以涼住冷氣，一於四個人坐低食返夠本。天氣開始轉涼，已經有羊腩煲可以食，但係叫返個嚟補一補先啦。佢啲牛腩好夠腍，最重要係夠晒入味，佢啲腐乳真係不得了。不過食耐咗一個湯就會變得有啲咸，呢個時候攞嚟烚埋啲菜就岩岩好。然後我哋叫咗個霸王薑蔥雞，佢啲蔥真係超級多，成件事好澎湃。而佢啲薑蓉就會另外上，唔會太辣，清清地。最重要嘅係啲雞真係好滑好嫩，隻雞都唔會太肥冇乜肥膏，連皮食時罪惡感都少啲啦。然後叫咗個豉油王鵝腸，佢啲鵝腸都好爽脆，不過我就嫌佢有啲唔夠鹹，如果可以再行少少咁就更加好啦。另外一個小食係椒麻魚皮，一個整法比較似大陸嘅做法，係我鍾意嘅爽脆同埋酸辣，做餐前小食同埋送酒都一流。最後仲叫咗個瑤柱扒豆苗，佢啲豆苗啱啱好唔會太老，瑤柱絲嘅份量都好多，基本上會夾起一處都會沾到。講咗佢呢度好新潮，連飲啤酒都可以有戰鬥碗，幾個人一齊開心share，啤一啤佢。佢呢度嘅價錢唔貴，但係每一份嘅份量都好足，確實係好抵食。