梨滿園韓國料理 (已結業)

話說上次韓城小學雞韓燒之後。燒出個癮來。又一晚係旺角聚集之後。竟然又話要食韓燒。諗起上次食完呢度唔錯。就拉大隊黎燒。清一色白燒。牛肋骨牛舌同豬腩肉。牛肋骨紅白雲石紋靚。未燒都知好食。果然在燒香兩面之後油香四散。咬落肉汁豐富唔會乾。薄切既牛舌係大醬同蒜頭既最好朋友。牛味夠濃可以同生蒜既辛同大醬既咸互相衝擊。爽彈既口感夾上蒜頭既粉爽。極重口味又極令人口味。好攻鼻？個口好似比火燒？ 咁就要乾杯真露落去。仲過癮呀！豬腩肉韓燒一定不能少！大塊燒香再剪成細條。塊肉唔會乾之餘又見食啲。用生菜黎包就可以中和返腩肉既油。真係多多都食得曬。真露上腦夠快夠爆。由其杯仔杯仔咁係咁乾。飲到咁上下真係要回一回氣。咁就整個鍋。有啖湯汁飲下。成隻既八爪魚。炆透既牛肉條。仲有泡菜同各種瓜菜煲呀煲。鮮味互相溶合。食返兩碗。個人清醒返啲可以行返條直線。飲飽食醉。正好返歸訓覺！