買送前就去食個tea先，
附近好多野我地都食過晒，
諗起未食過炑八嘅下午茶就一於黎試下，
我地大概2點45分到，餐廳只有幾枱客人，
所以唔需要等位就可以入座，
呢到環境大又舒服，
啱晒同好姊妹一邊食一邊傾，
呢到嘅tea set都幾抵，
$48有主食，小食，無限添加前菜，湯品，飲品，
前菜
係可以無限添加嘅，
味道正正常常，無咩特別驚喜，
韓式清湯
上枱時湯品熱辣辣，清清地味道唔錯，
湯入面有幾條細魚仔，應該就係湯底味道所在，
感覺唔係味精湯，飲完唔覺得口渴，
安東雞脾
雞脾好大隻，味道幾特別，
雞肉嫩滑入晒味，睇黎係心機之作，
蕃茄仔同沙律菜可以解下膩，
值得一讚嘅係沙律菜都加上芝麻醬，味道幾好，
無骨炸雞
呢味有驚喜，炸雞聽落感覺好熱氣，
呢個炸雞無呢個感覺但係做到外脆內嫩，
加上特別調配嘅醬汁，酸酸甜甜，讚，
迷你烤牛肉流心蛋飯
下午茶黎講份量算幾多，
牛肉醬汁做得唔錯，亦煮得啱啱好，唔會過熟，
加埋有流心蛋撈飯，簡直係大滿足，
炑八撈麵
點餐前侍應細心地提醒呢個撈麵有花生醬，
值得一讚，可以讓對花生敏感嘅客人知道，
最後我叫左走花生醬，流心蛋下有沙律醬及肉醬，
味道帶少少酸味，都唔錯，
柚子冰茶
柚子味道清新而且唔太甜，啱晒我地，
呢到下午茶唔需要加一，
埋單每人都係48蚊，有咁多野食，
真係好抵啊。
