史生之前份工做得唔開心, 所以決定辭職轉工, 佢好快就搵到第二份工, 其實佢真係好叻架! 所以我決定請佢喺佢番工前請佢食番餐好o既!
我哋7點到, 因為好早所以唔駛等位. 史生鍾意食蟹又鍾意食辣, 所以第一時間叫避風塘炒蟹先, 而佢同我都鍾意食花甲, 所以點都要試吓, 而因為我唔多食蟹, 所以叫番個雜菜煲俾自己.
首先花甲上場, 好大隻呀!
雖然份量唔多, 但好鮮甜, 不過略為過火, 所以老咗少少, 而湯底有少少胡椒, 粉絲吸晒啲湯, 好好味呀!
跟住係雜菜煲, 嘩~
好多菜好豐富呀! 魚湯底但應該唔係鮮魚煲o既, 但都好好味, 所有菜都好新鮮, 呢個煲絶對抵食夾大件呀!
主角出場啦! 我唔記得隻蟹幾重, 但其實無論幾大, 史生都可以一個人解決佢架! 隻蟹俾金蒜山活埋, 金蒜同其他避風塘炒蟹o既唔同, 呢度加咗麵包糠, 所以比一般金蒜乾身, 我就比較喜歡呢種金蒜, 所以忍唔住叫咗碗白粥嚟送金蒜.
史生食得好開心好滋味, 而我睇住佢食得開心, 我不自禁回心微笑, 其實"你快樂所以我快樂"呢個道理就係咁簡單囉!
