今次我哋二個人去食叫咗2款丼飯同小食，埋單只係$418，呢度嘅定價對比質素算超值，份量夠足兩人食完都非常滿意。
海鮮丼飯 $148
一上枱已經令人成個人醒晒！滿滿海鮮堆到成座山咁，三文魚腩肥美油香、入口即溶，海膽份量多，新鮮入口甘香，油甘魚厚切肉實，仲有隻大大隻帶頭甜蝦，肉質超鮮甜。底下醋飯粒粒分明、酸度剛好，混埋醬油一齊食，啖啖鮮味無得輸！
燒三文魚炙燒壽司 $16、燒帶子壽司 $28、燒海膽壽司 $28、花之戀 $16
壽司愛好者一定要試！燒三文魚壽司帶住魚油香，咬落軟綿；燒帶子香氣突出，肉厚飽滿；燒海膽壽司入口即化，鮮甜唔腥；兩款火炙魚壽司都有醬香同濃郁魚油味，搭配燒帶子一齊食層次更豐富。
值得一提嘅係呢度都有花之戀食架，花之戀細細件又精緻，用咗肥美三文魚加魚子點綴，入口鹹香又有鮮甜感。
炸日式餃子（4件） $38
炸皮夠脆，內裡多汁唔乾，豬肉餡調味啱啱好，非常適合啲鍾意食小吃嘅朋友。
芝士年糕（3件）$42 呢款小食係我哋今次嘅驚喜之一。年糕外層煎得微微焦香但仍然保持煙韌彈牙，配合溶岩式嘅芝士醬，好邪惡又滋味。香濃芝士味同煙韌年糕嘅口感好夾，係條街上難得一試嘅日式風味小食，特別適合芝士控或者想食啲唔同嘅朋友。
總括嚟講「鮮丼家」整體新鮮度高，每款丼飯同壽司賣相吸引，刺身件件都厚切，魚生新鮮完全感受到用料夠誠意。無論獨食或成班朋友飲杯酒吹下水都適合。以呢個價錢試到咁有水準嘅日本菜，性價比極高！
1
1
