甘味讚岐手打烏冬 (已結業)

呢間位於APM六樓戲院旁邊嘅日式烏冬店可謂屹立不倒，歷久不衰。正當同一商場內嘅「和花亭」早已消聲匿跡之際，同期開張嘅「甘味讚岐手打烏冬」依舊客似雲來唔憂做。憑什麼呢？我唔知道。軟骨餃子棒－真係有軟骨，啖啖都咬到好爽口嘅軟骨，外皮煎得嚟唔熱氣，脆得嚟唔會吉親條痢，可以一試再試。雜錦讚歧手打烏冬－溫泉蛋生咗少少，椰菜西蘭花吸左湯味夠稔身亦清甜，老翻蟹柳不提也罷，竹輪燒仲有日式＠字魚蛋，都係果隻味道，無端端有一小塊急凍貨般雞肉，無助於挽救整碗烏冬嘅食味，炸蝦天婦羅粉漿太厚浸一陣就可以成層粉皮剝離蝦身，搭多幾片菇就成為一碗雜錦讚歧手打烏冬，我唔覺得得佢係好好食，但係唔算難食囉。鹽燒雞翼－任何入過廚房煮過嘢食嘅人都應該知道嘅雞類凍肉處理常識，唔係從醬料出發就係响醃料處入手，否則雪雞味會出哂事。呢個雞翼只响表皮落層鹽就想過骨未免很天真很傻，一咬之下除了鹹味就沒有雞肉鮮味，剩下的就係陣陣雪藏雞特有的嘅禽鳥味，本來畀翻多少肉汁睇吓係可以彌補過失，之但係果層雞肉係鞋口而乾爭爭嘅。