倫哥尊尚火鍋私房菜 (已結業)

聽講佐敦一間超級大間嘅火鍋私房菜，今次就約咗位朋友想去食，按人頭收費，而且係半任食嘅。入到去之後就先有啲前菜小食，有四款唔同，都幾吸引。之後就揀雞煲，我哋選擇咗BB辣，都幾入味，而且好大兜，如果驚食唔晒最好同佢講少啲雞，因為食完都飽左一部份。不過都幾好食的，裏面有啲芫荽，好香！仲可以加啲佢配搭埋比你嘅魷魚，估唔到個味道都幾夾，好爽口！與此同時有好多高質素嘅海鮮都會包埋，已經幫你調味同埋煮熟左，直接食就可以，味道好新鮮。食完雞之後就可以揀個湯底，我哋就揀咗蕃茄湯，味道香濃夠新鮮。最值得提嘅就係佢會有一個海鮮拼盤，部份海鮮可以重複落單，有部份貴價小小嘅海鮮就只有一次性，不過見到無論係size定係口味都係好大同埋好新鮮，出去買都唔平啦。同埋一個高質素小小嘅牛都好重要，見到佢啲花紋分布好靚，而且食落去都好滑，口感一流。其實仲有好多其他嘅手打魚滑，餃子，各式各樣嘅丸，仲有非常香脆嘅炸魚皮，響鈴同埋夠晒豐富嘅蔬菜，當然食完都可以繼續叫，不過正常食完呢啲應該已經飽到飛起！同埋出面啲飲品都可以自己揀，任飲，所以幾百蚊食到咁豐富嘅海鮮雞煲火鍋，包食到飽，真係抵食。