龍莊川粵小廚 (已結業)

佐敦近廟街個頭確實係好多食肆，不過再行遠少少就有間幾出色嘅川菜食。呢間舖外表比較舊式，但好適合一大班人或者一家大細去食。今次叫咗個水煮魚、麻辣青瓜、椒鹽鮮魷、欖肉碎炒四季豆同埋口水雞。個水煮魚真心正，大大碗個面鋪滿辣椒，入面仲有好多料， 好似有豬紅、芽菜、紅薯粉。 當然有最緊要嘅魚肉啦， 個魚肉有得揀生魚或者桂花魚。我哋今次揀咗桂花魚，個魚肉好嫩口之餘最重要係冇魚骨，食辣嘢咁樣食先係最爽嘅！ 而且個辣度適中唔會太辣。麻辣青瓜好醒胃，青瓜清爽。椒鹽鮮魷外層脆脆哋食落好滋味。欖肉碎炒四季豆，用嚟送飯最一流。不過唔知係唔係食咗水煮魚個辣度，反而個口水雞有少少遜色。整體嚟講都算高質。水煮魚（桂花魚）叫幾款餸適合一家大細嚟食。