JK Kitchen (已結業)

銅鑼灣通常都係食啲高級餐廳，好少食啲住家feel嘅嘢食，今次去咗永光中心試咗一間樓上越南菜，真係好有食緊住家飯嘅感覺。一上到去個裝修已經俾你一種好窩心嘅感覺，有梳化啦，有大電視，好似屋企咁。而且個色調呢都係以淺藍色為主，成個感覺都真係行warm嘅路線。嘢食同平時嘅越南菜差唔多嘅，今次就叫咗個小食拼盤蒜蓉炒通菜同佢哋嘅招牌炒米粉。個拼盤有五款嘢食有魚餅、雞翼、蔗蝦、薯仔包蝦，當然仲有越南春卷。春卷、魚餅嘅調味繼好，雞翼炸得幾香口，蔗蝦個蔗好甜好清，薯仔包蝦係特別嘅，都好脆口。然後蒜蓉炒通菜真係落足蒜蓉，絕無欺場。炸蒜生蒜都有一齊落，上碟嘅時候仲有一對炸蒜鋪喺面，真係落足料。最後試埋佢個老闆娘炒米粉，其實呢就係有豬頸肉炒嘅米粉。炒落去都算惹味，如果佢可以落少少辣呢，咁就會更加好啦，味道應該更加出。我想講碟碟都好有份量，真係好有家嘅味道呀！仲要老闆娘好貼心臨走會送甜品，我哋就食咗紅豆椰汁糕同埋三色啫喱。成個椰汁糕面都鋪滿紅豆，好好味；個啫喱好挺身，唔會太硬(姐係太多魚膠粉)，都唔會太腍(太多水)。間餐廳真係真材實料嘅！十分好呀！以家為主題嘅越南菜。